花旗股市上禮拜五顯著上升,噚日港股大幅反彈,不過即月期指結算,淡友喺高位力壓,恒指升到10日線遇阻,無力再上,反覆跌番落20737收市,上升139點。
恒指重越100日線,技術上叫做穩番啲,不過20800至21130阻力重重,要突破唔係咁易。今日賣地成績會理想,但地皮唔算太大幅,成交價唔會有新啟示,樓市成交淡靜會繼續多一段時間。
財險C輪20569:中國財險(2328)噚日報收8.95元,升3.5%,同備受沽壓嘅中國人壽(2628)成強烈對比,財險技術走勢再度轉強,亦會受惠於一啲沽國壽嘅換馬盤,股價短線有力再試9.50元,破位睇10.50元,可以翻兜隻C輪20569。
隻輪現價13.6仙,2010年12月13日到期,行使價8.28元,溢價7.7%,引伸波幅53.2%,槓桿率6.6倍(有效4.4倍),正股升上10.50元,20569睇25.4仙,正股跌穿8.45元就沽咗隻輪。
俊樺