黎明（Leon）旗下三位愛將衞蘭、文詠珊（JaniceMan）同李治廷主演嘅新戲《為你鍾情》，噚晚喺尖沙嘴搞首映，有份演出嘅前輩狄龍同邵音音都有出現。愛將新戲上映喎，Leon當然現身支持，不過又唔想搶晒鏡，所以Leon旋風式出現咗3分鐘咁多，佢喺台上話：「我自己初出道做影壇新人嗰時，記者前輩好錫自己，希望家都係咁，大家有機會睇吓套戲，睇咗覺得係有誠意。」Leon一講完就速逃，連大合照都冇影，真係隨時睇漏眼。
幾位主角出場都好特別，JM為咗配合劇情俾狄龍綁住坐遊艇現身，而衞蘭同李治廷就喺台上唱住歌出場。原來噚日係邵音音同Leon經理人陳善之生日，衞蘭主動話要唱生日歌送畀兩位壽星。
李治廷走音
問到JM，Leon好似特別錫佢，連出場都零舍搶鏡，JM都忍唔住話：「係呀，好開心，其實Leon個個都錫，我會珍惜機會。」JM話Leon不時教佢做戲，但究竟佢明唔明金句王Leon講乜？JM話：「明喎，溝通完全冇問題。」至於男主角李治廷唱新歌時唔小心走音，事後佢話：「我好投入，唔發覺，我成日冲凉時都有練歌，不過可能唔夠瞓有影響。」李治廷又話拍另一套戲時唔小心俾對手打到塊面，當場流鼻血，好彩冇破相咋。
