大學管理層音樂椅遊戲轉不停，新學年八間大學多位副校長有新面孔，正在重組架構嘅科大噚日宣佈，前香港總商會行政總裁、現任利豐集團中國辦公室董事總經理翁以登，11月上任首席副校長（大學拓展）。
翁以登出身商界，忽然投身高教界，八方固然驚奇，據講唔少科大中人都感到意外。知情人士稱，校董會唔少人賞識翁生，因此佢入清水灣冇乜難度，而呢次任命十分低調，連人事部都係上星期尾先知。
主要職責係籌款
根據資料，負責「大學拓展」嘅首席副校長，主要工作係「加強各界對科大的支持和捐獻」，講得白啲，即係負責籌款；至於使唔使孭數，校方稱涉及合約條款，不便透露。部份外國大學嘅籌款大員薪酬同籌款額掛鈎，唔知翁以登份合約，係咪咁有挑戰性呢？
翁以登透過科大公關稱，在上海工作四年半，覺得係時候鳥倦知還，回港服務，又話未入商界前，其實同科大校長陳繁昌一樣都係一個數學家，同學術界有淵源。本地大學募捐係大勢所趨，學者籌錢未必在行，搵外援或成趨勢，城大都擬設同樣職位，加強開源能力。