我求大俠唔算持家有道，成日買咗貴嘢都唔知，唔似得家庭主婦咁留意日常用品價格；不過講「精明眼」，AC米蘭就一定叻過好多師奶，今次就免費將伊巴謙莫域從巴塞隆拿帶番去米蘭，如果贏埋聯賽，呢單交易就抵到爛。
上年夏天巴塞隆拿有錢就身痕，用4,600萬歐元（約4.5億港元）加上射手伊度奧，從國際米蘭收購伊巴謙莫域，當時巴塞上下都好意氣風發，號稱呢單交易總值7,000萬歐元（約6.9億港元），僅次於C朗成為世界第2高球員轉會。但呢位28歲射手加盟巴塞後，就認真唔對辦，成日企喺禁區頂等機會，阻住美斯、恩尼斯達發圍，結果巴塞由前年6冠王，搞到上季得番西甲冠軍一個錦標。
先借後買僅值2.3億
巴塞新會長羅素一上任就嗌窮，球隊又要簽利物浦嘅馬斯真蘭奴，伊巴自然成為開刀對象，今次AC都算執到筍貨。事關堂堂一個國際級前鋒，巴塞都准AC先借後買；AC只需付出約1,000萬歐元（約9,900萬港元）嘅年薪，如果啱使，AC來季可以2,400萬歐元（約2.3億港元）優先收購佢。嘩！就咁計一計，巴塞已經蝕成4.6億港元。西甲連埋各盃賽，伊巴都係幫巴塞入21球咁大把，即係伊巴一個入球，就花咗巴塞超過2,000萬港紙。
有冠軍命AC執好嘢
AC由簽細哨、借碧咸，次次都機關算盡，今次副會長加里安尼親自飛到巴塞隆拿，自然冇空手而回。其實伊巴懶還懶，但由馬模成名後，都幫阿積士、國際米蘭同巴塞隆拿贏過聯賽冠軍，腳頭都唔算差，睇吓呢次伊巴踢AC，可唔可以打破前球會國米壟斷意甲嘅局面。
正所謂「只見新人笑，不見舊人哭」，巴塞就懶理伊巴走人，全力迎接新兵馬斯真蘭奴。馬斯真蘭奴周日已飛抵巴塞機會，周一通過體測，就完成2,200萬歐元（約2.2億港元）嘅收購，巴塞教練哥迪奧拿就大讚呢位26歲中場：「唔好以為佢淨係識防守，佢傳球、射門樣樣掂，同布斯基斯合作，可鞏固球隊中後場。」