伯南克上禮拜五嘅演說全球關注，雖然聯儲局除繼續購買長期國債之外暫時唔會有新行動，但伯南克明確表示，如果經濟下滑，聯儲局會推出更多非傳統嘅貨幣寬鬆措施支持經濟。呢番話好似粒定心丹咁，花旗股市大幅反彈，道指報收10150，有機會進一步試10400。
港股今日期指結算，好友好大機會大反攻，恒指有機會上試10日線（20871）。
中煤C輪23498：中煤（1898）上日報收11.04元，升1.2%。股價近日喺11元水平整固，呢個禮拜應該會上試11.60至12元區域，破位會開展新升浪，下個目標12.60元，可以諗吓隻C輪23498。
隻輪現價16.6仙，2011年2月28日到期，行使價10.38元，溢價9.1%，引伸波幅42.4%，槓桿率6.7倍（有效4.3倍），正股升上12.60元，23498睇27.8仙，有67%上升空間，正股跌穿10.50元就沽咗隻輪。
俊樺