今屆留喺丙組嘅老牌球會東方，噚日喺高士威球場開操，舉行拜神儀式兼賀新任主席康寶駒大壽，我求大俠亦專程落去捧場。睇名單知道東方今季繼續增兵，搵埋黃偉德同梁錦輝重返母會，而教練層份量亦加強唔少。
今年回流香港嘅著名足球評述員黃興桂擔任主教練之餘，亦搵埋剛剛落山嘅前南華教練黃文偉做技術顧問；另外前東方助教陳銘開亦復出幫手，加埋原有嘅李健和、羅繼華同鍾皓賢，可謂人強馬壯；而「金句王」黃興桂見到咁嘅教練陣容，都忍唔住爆其「有今生，冇來世」金句助興。
總監梁守志話，球隊搵咁多教練幫手，班費成300萬港紙，而最希望可以培訓小將成才，所以今季會盡量畀機會佢哋，由歐偉倫同李健和等前港腳帶住佢哋爭取成績，長遠可以成為本地球壇接班人；至於會唔會爭取重返甲組，梁守志就話要睇時機。今屆丙組下個月尾先開鑼，而東方要到10月3日先有比賽，首戰喺葵涌運動場對宏輝駒騰。