【北京直擊】章子怡、黃曉明、伊能靜同黃奕等，噚晚喺北京出席「增愛之夜感動中國」慈善拍賣晚宴，衣香鬢影，當大會安排嘉賓行紅地毯時，所有嘉賓都喺同一區等候，惟獨章子怡自己留喺VIP區，等壓軸入場，凸顯佢與眾不同嘅身份。大會舉行拍賣晚宴，籌得嘅善款，會資助貧困教師同教育行業相關團體。
黃曉明向來為善不甘後人，佢話：「慈善不是暫時的事，是一輩子的事，只要有慈善活動我會盡量參加。」
尾指戴鑽戒
章子怡着咗件斜膊晚裝到場，打扮高貴，但身上未見太多首飾行頭，最搶眼莫過於右手尾指戴住鑽戒，不過傳統尾指戴戒指暗示離婚，咁樣戴法似乎真係有啲唔吉利。章子怡呢排頻頻出席慈善活動，以行動展示愛心爆棚，佢經理人紀靈靈表示：「子怡一直參與很多慈善活動。」
章子怡進入晚宴會場，竟成為來賓嘅人肉佈景板，唔停咁要求佢合照，搞到佢都冇機會食嘢。章子怡入座後被編同黃曉明並排而坐，拍賣時，章子怡想用33萬人民幣競投一條紅色晚裝，但最終被另一嘉賓用50萬人民幣投得。
另外，後日係開學日，央視日前就同教育部舉行咗公益節目《開學第一課》，邀請咗章子怡、李連杰同房祖名等喺長城錄影，準備後日朝播出。錄影時章子怡同小朋友一齊唱歌跳舞，仲教小朋友講英文㖭。