好好地去菲律賓旅行，點知魔警脅持人質，釀成八死七傷，小妹話過唔會去菲律賓。短線遊有好多選擇，根本唔需要去菲律賓。新加坡航空PR哥哥Harry同小妹報料話，新航趁暑假完結，同新加坡旅遊局、樟宜機場合作，推出新加坡過境假期住宿優惠，吸引啲過境客留喺新加坡玩番晚。
樟宜機場每日送錢
旅客只要乘搭新航（圖）過境新加坡前往其他城市，就可以港幣270蚊住宿新加坡酒店一晚，但係要喺10月31日或之前訂購，同埋11月15日前完成整個旅程，最少兩人入住，即係兩人一房540蚊，「呢啲酒店原價要成820蚊，今次優惠平咗大約三成半。」
Harry話，旅客除咗平住新加坡一晚，仲可享其他優惠，包括機場至酒店嘅免費巴士接送、聖淘沙島或新加坡動物園等嘅入場券、無限次搭乘新航隨意行巴士（SIAHop-OnBus）、亞坤餐廳免費咖啡或茶及吐司一客、免費國際電話卡、10元坡幣樟宜機場購物券等，「呢啲優惠加埋總值都有五百幾蚊港幣。」
Harry話，家唔少旅客搭新航去澳洲或歐洲，去程嗰陣都會留一日玩新加坡。有興趣嘅旅客可登入新航網頁 http://singaporeair.com.hk訂講新航推廣機票同新加坡過境假期優惠。旅客家喺樟宜機場購物消費，仲可以參加抽獎。機場每日送出1 ,000元坡幣獎賞（即港幣5,700），終極大獎金額仲超過100萬坡幣（約港幣570萬）。詳情可瀏覽 http://changiairport.com/millionaire。
電郵：mailto:[email protected]