中視金橋（623）有靚仔業績，但股價就掉頭插水，仲好，畀大家買平貨機會。中視金橋上個星期最多累跌25%，但上星期四公佈嘅2010年半年度（6月底止）純利，就大增咗1.1倍到2600萬銀人仔。仲要咁睇，通常第一季係集團銷售淡季，但半年度純利增長已經有板有眼。隨住集團踏入銷售旺季，加埋祖國經濟持續回穩，下半年度業績應該仲有睇頭。再講，中視金橋亦係央視最大嘅民營廣告時間代理商之一，有呢個特定優勢，更加坐定粒六。
唔使估多，中視金橋2010年度純利係咁意翻半番，到1.46億銀人仔，預期PE跌到得番7倍，吸引到痹。呢轉吼實，中視金橋股價再跌，兩蚊樓下兜底，以10倍預期PE做目標，集團要見2.94元，潛在回報率挨近50%。
景福PE同業中最低
景福集團（280）最新NAV每股2.15元，現價（1.03元）折讓52%。景福係所有金飾零售股當中，PE最吸引嘅選擇，景福最新PE6.9倍，就好保守當集團本年度純利，只係維持到上年度水平，PE仲係講緊單位數。相信中港經濟回暖，景福2011年度業績會有增長，PE仲低。呢轉短打，博景福升20%到1.24元，目標價未有耐上到NAV水位，論PB，仍然係最吸引之選。
錢雋