哥哥扮演嘅《鎗王》阿Rick，性格孤僻冷靜，更殺人如麻，睇到我心都寒！新一集《鎗王之王》改由爾冬陞執導，演員當然亦唔同晒。今次藍光版本採用DTS-HDMA以及DolbyTureHD7.1兩種立體聲效果，用嚟測試來自四面八方嘅槍林彈雨，一流！
記者：陳國輝
BD50格式 槍聲更準繩
任何槍戰、大型爆炸場面，聲效主要靠後期製作，否則你又點會一時喺前置喇叭，聽到「嘭嘭」兩聲，跟住後置又聽到「嘭嘭嘭」三聲先！BD版演繹嘅槍聲穿插，係咪好到位，要視乎你套架生有幾砌得，如果你聽緊7.1，恭喜晒！因為《鎗王之王》同時正支援DTS-HDMA7.1以及DolbyTrueHD7.1兩種制式，而且對國語觀眾亦不薄，揀選聽普通話，亦享受到7.1音效嘅震撼，港產片當中真係唔多！
另外，呢套片採用BD50格式，同一般BD25比較，唔止容量大一倍，更具意義係BD50能容納更闊嘅音域，低頻亦可以做靚一點，話說回來，以上全部係後期製作嘅努力，究竟《鎗王之王》有幾勁？要自己買嚟試吓喇。
膚色偏暖黑位少雜訊
欣賞《鎗》梗係聲多於色！畫面製作上唔算咁標青，但亦未至於不能接受，例如古仔、阿Sa等幾位主角，膚色雖然偏暖色調，但感覺整體好統一，唔會出現一時黃、一時藍嘅奇怪現象；再者，黑位表現都值得讚，如一幕吳彥祖同方中信一齊去研究案情時，背景雖然係室內廢鐵場，光源極為缺乏，不過燈光表現好，人臉、衣衫等輪廓統統出晒嚟，黑位也甚少雜訊。
刪剪位見戰車喪跑
港產片無乜Bonus都預咗，只係無諗過睇完《鎗王之王》，反而有驚喜！收錄內容不外乎幾類：演員專訪、刪剪片段、幕後花絮及製作特輯等，其中訪問過當武術指導嘅錢嘉樂，另外刪剪片段中更多達7段，最尾兩段更有日與夜嘅鍊車追逐場面，內容係咪好刺激震撼？留番大家睇完再講，但拍攝手法同背景，就有啲似《烈火戰車》及《頭文字D》嘅混合體囉！
Profile
類型：Blu-ray（50GB）
音效：DTS-HDMA7.1、DolbyTrueHD7.1
特別收錄：製作特輯、拍攝日誌、演員專訪、幕後花絮、刪剪片段
$169（BD）
$99（DVD）
$49（VCD）
域高娛樂（23963000）
