如果你打算開一間高級時裝店，你第一件事應該請我，而不是市面上最吃得開的公關公司或者大笨象都賣得出的超級售貨員，因為你最需要的是一張全港時裝大客的AAAlist，而這張名單剛巧我有，不，應該說，只得我有！
「怎樣得來的？」你會問。
嘩，大佬，小弟行走漿糊幾廿年，但凡本地自稱喜歡買衫的捨得買衫的人，未給我撞過的都好打有限啦！
要不然你以為除了當值的售貨員外，於全港各大時裝店出席率最高的人是誰？
事實上，正如你去得多電影節自然儲落一班「撞口撞面」由唔識都變到點吓頭的「熟口熟面」，又或者因去gym去得多或者放狗放得密而結交的「gymfriend」「放狗friend」，我也有一班買衫買到熟的「boutiquefriend」，甚至，有些人過去二十年內根本從未在時裝店外的地方見過，例如由香港撞到上北京的王菲小姐便是其中之一。
所以呢，自然有些故事，可與天下行街精分享一下，今日先揀三段「稀客篇」好不好？
你撞過汪明荃未？
稀客也分等級，跟「撞中率」來排，由易到難。
Liza姐那麼靚又那麼貪靚，要在時裝店撞到她不是最難，但據說她專揀oddhours出沒，所以也算稀稀地的客。
那一年，在廣東道上，汪明荃綁架了我！
那個星期日合該有事，和家人在尖沙嘴行行吓，忽然撞到趁放假出遊拍拖的阿姐與家英哥，寒暄兩句後我偶像忽然問：「阿Y抿，你一陣間有咩做？」我話冇呀都係同屋企人四圍行吓咁咋咁冇乜特別o架……
「咁啱喇，不如你同我去Joyce揀條裙好唔好，我冇衫着呀！」
嘩，「I'vegotnothingtowear」對貪靚鬼來說是好大件事的，加上那個是汪明荃，我又豈敢不從，便惟有馬上丟低家人，即場應召入伍，去那時還在彌敦道舊瑞興百貨的那間Joyce。
詳情不表，因為如今只剩下一個鏡頭還記得：我替阿姐揀了條Fendi黑色onepiece裙，但阿姐話那個價錢超過了做《歡樂今宵》的budget，不作考慮。哦，原來不同場合不同show的置裝預算是不同的，想落這種量入為出確有道理，學到嘢啦我！
你們不要以為阿姐使人唔使本，我陪了她兩粒鐘甚麼也買不到，她都請我去吃一餐好貴的日本菜，而重點是，人生首次與Liza姐同枱食飯，priceless！（而且我看得出，《EYT》置裝費雖有budget，但犒賞幫她買《EYT》裙的人卻沒有，抵我咁鍾意汪明荃o架啫！）
你撞過×××未？
用得×××當然唔慌好嘢。
或者這種喺街上面撞到我才可以問的「姑諱其名」，對你來說才是筍嘢也說不定。
此人以前工作上合作過，喜歡「恰」人所以印象不太好，想不到那次在時裝店裏撞到卻一反常態地nicenice！
三句假問候之後果然入正題：「呢，我想問吓你呢，我下個禮拜要去＃某大場面＃，你話呢件褸入面着件咩好呢？」
唔通我話「咦~以前你對我咁衰，我唔教你」咩？便給了此人一些建議，教此人滿意地離開。
誰知一星期後我看報紙便變成「×××特別邀請黃偉文替其挑選戰衣」，本來有人覺得我幫忙揀衫也算一回事，我應該覺得榮幸的，但此人無恩於我，既沒給我錢連魚蛋也沒請我食一粒便借我過橋，難免有搵笨之嫌，所以我保留了「唱」的權利，並在今日這裏行使了。無數！
你撞過劉德華未？
老老實實，縱橫時裝界幾廿年，真係只撞過華仔買衫一次咁大把。但我相信，已算好勁，因為睇怕都冇乜人試過。
94或95年的歷山大廈JeanPaulGaultier，我對着一件好勁好勁的登台服發呆發了45分鐘，那是一件米色西裝褸，但胸前兩大幅卻用了一種類似「立體眨眼postcard」的物料製造，即是在不同角度看會出現桃紅鮮黃或湖水綠的幻彩PVC，我查實好鍾意，因為着住佢做show一定搶晒，只可惜要賣一萬五千蚊，是1995年的一萬五千蚊喎，為了一件只能着一次威一威便人人認得唔再着得番的costume，剛出來做嘢的我其實負擔不起。正在下定決心轉身離去之際便見到華仔行入門口，那是我這麼多年來唯一一次見到劉德華行街買衫。
一星期後我被派去電台主辦的「AndyLauminiconcert」做司儀，由於沒有買那件JPG勁嘢，所以我便穿了件Dolce&Gabbana的「平價」冷衫上台介紹華仔出場，誰知我甫下樓梯回頭一望射燈照耀之處，便見一熟口熟面物體自升降台底緩緩升起，咦，呢件咪嗰件獨一無二價值連城的JPG？原來華仔後來買了，價錢雖「乸脷」但劉天王當然着得起有餘，何況用作開場效果一流直頭抵㖭！
正當我腦袋裏正在想這些東西時，台上的華仔便有所動作──他竟然將那件皮幾嘢的褸慢慢除下，那首歌他都未開始唱，在我眼中天價的靚衫出場時間竟不足15秒！嘩，我心諗，阿華仔佢買衫做show都真係好捨得……誰知我個「呀吓」兩個字都未講完，便見他將那件抵得上當時7個菲籍家務助理一個月人工的「幻彩PVC」，「嚟手」便fing了落台下送給fans做紀念品……那一刻，容許我講粗口，我真係呆×咗！到我想起要放下身段不理儀態仆出去接住時已經太遲了，那件一萬五千蚊的JPG早已被wing到第8行禾輋邨Jenny那對汗汁汁的肥手上並被捧埋鼻哥前面大力聞緊喇……
Textby 黃偉文
mailto:[email protected]
微博 http://t.sina.com.cn/wymanwong
本欄逢星期日刊出
