概念車外形極度天馬行空,但好以Infiniti咁玩埋車殼閃銀物料,似足Marvel英雄戰車咁科幻超搶眼。呢位閃銀俠最寸係玩孤獨,前座兩個位劃清界線,司機位成個獨立駕駛艙咁,要同隔籬靚女講:「唔好挨埋嚟!」
記者、攝影:徐影龍
鳴謝:合誠汽車
猶如銀雕塑
已不止一次親身到訪日產橫濱總壇同試車場Grandrive,不過位於神奈川縣的DesignCenter,就充滿神秘色彩,除了因為首次到訪外,仲講明不可周圍亂影相。走馬看花本來無乜期待,當去到Infiniti核心部門,見到由DesignDirector中島貴司設計的概念車Essence後,全球共60位記者即時舉機喪影,一堆閃光燈打落恍如鍍銀的車身上,反光範圍驚人,幾乎要戴太陽眼鏡先睇到!
眼睛適應後再細心欣賞,發覺車身線條好靚,Infiniti的跑車設計一向大膽,Essence低矮車頂及充滿曲線的車側,再加又幼又長的頭尾燈,驟眼望似尊雕塑藝術品,又真的搶眼過好多ConceptCar,仲獲得LV專為它而設計的一套三件皮具,Fit晒尾箱Size,不愧為Infiniti20周年的代表作。
獨立式座艙 專心揸車
Essence外形夠囂張,內櫳都特別玩嘢過人。近乎全天幕玻璃車頂,最啱夜晚曬月光數星星,兩口子向上望,就好似進入太空館天象廳睇九大行星咁過癮。且別高興,Essence屬雙門Coupe跑車格,實際試坐過後,發現全車兩個位偏偏採用獨立設計,司機位同乘客位不但用上不同顏色的皮料,連中控台至中央手枕位,都用上又高又闊的設計,根本可用兩個獨立座艙來形容,若果仲有本事搭到隔籬位靚女個膊頭,你對手都真是幾長!
Essence採用3.7LV6引擎,再配搭TwinTurbo及缸內直噴技術,馬力已達到440匹,再加埋電摩打玩混能,總馬力去到600匹,司機都是不要分心,專心揸車吧!
神奈川DesignCenter懶神秘
日產位於神奈川厚木市嘅DesignCenter,由於內裏盡收旗下各式試製品及原形設計,所以謝絕參觀者影相。行完一圈,見到Juke同March等例牌新車唔出奇,偏偏獨欠GT-R、370Z等高性能跑車。雖然無乜驚人秘密,不過喺一列列會議室之間,會擺放各式各樣設計獨特嘅產品簡介,奇怪在同車完全風馬牛不相及,如adidas波鞋科技、外形古怪嘅碗筷等,唔知係標示屬佢哋設計,定抑或畀班Designer作BrainStorming喇!