3D電視機年初啱啱推出巿面嗰陣，以天價發售，講到四、五萬蚊一部，喺商場展覽，畫面係幾靚，小妹得個睇字。點知過咗大半年，啲3D就冧價，Sony噚日公佈推出全新嘅NX全高清3D電視機系列，平到唔使兩萬蚊。
EdgeLED背光技術
Sony高級巿場經理黃俊豪（Bert）話，之前賣嘅3D電視機都係高階型號，價錢係幾貴，家多咗人認識，需求日大，Sony於是推出價錢大眾化嘅入門級機種NX系列，分40吋、46吋、55吋同60吋款式，其中40吋賣$17,280，比2D電視機唔係貴好多，包埋兩副3D眼鏡、3D示範影碟，46吋都係賣$23,280，算係大眾化價錢。今次仲出埋一條龍3D套餐，加多$1,600，包埋320GB、原價$2,549嘅P3S藍光遊戲機連3D遊戲碟。
價錢就幾吸引嘞，質素又點先？Bert話，新機用咗EdgeLED背光技術，加強畫面對比度，加埋Motionflow技術睇高速移動嘅體育節目，畫面保持清晰流暢，用嚟打機都冇問題。
齋聽數據冇用，親身試睇最實際，小妹戴住副3D眼鏡，電視播緊海底世界，啲魚仔好似游出電視框咁；再睇埋3D電影《愛麗絲夢遊仙境》片段，畫面嘅清晰度、立體感，比起戲院睇效果完全有得揮。
Sony即日起至29日喺沙田新城巿廣場設展覽場Show晒啲3D影音產品，除咗電視機，仲有全新旗艦級無線藍光家庭影院組合、3D相機TX9。畀消費者任睇任試。
電郵：mailto:[email protected]