有評論指打電話羅生門反映香港缺乏所謂「次外交」機制，認為香港應同國際發展多啲民間聯繫，立法會議員李卓人可能做到示範，早前去德國見到女總理默克爾，下星期五就有機會同日本首相菅直人面對面開會。
阿人透露，今次與日本首相開會，係由於亞太經合組織會議11月喺日本開會，按慣例工會代表可以先與主辦國領導人見面，討論區內經濟、勞工問題。佢下周二起程，一連三日開會，星期五見到菅直人，佢又話今次有機會代表工盟見日本首相，要多得有聯絡嘅一個日本工會，係執政民主黨樁腳，有此關係，要見菅直人自然水到渠成。阿人又話此行目的，係希望可以趁機串連亞太區工會舉行一個高峯會。