如果想買架價錢平又實用細車代步，相信好多人都話：「豐田Corolla啦！」成為眾人的不二之選，當然是豐田多年來的王牌小車。為鞏固王者地位，Corolla今年再換面力保年輕，人氣一樣勁的新8模JeanaHo親身示範Corolla載住返工去玩兩個Look，話你知老牌車一樣Young得起。
記者：許維雅
攝影：伍慶泉
Model：Jeana@GME
日圓高企車價微升
其實唔止新車，連二手市場同樣吃得開的Corolla，全賴多年穩守實惠、慳油及耐用的抵玩宗旨，雖然1.5公升引擎依舊輸出109匹馬力，但最重要是油耗每百公里只需7.1L，牌費平、養得易、夠安全、操控舒適等因素足以滿足一眾新手。唯一可惜的是日圓高企等因素影響，令豪華版車價微升至差不多要20萬，若然大家唔介意無天窗及真皮椅，不妨先考慮入門16萬幾的卓越版，其餘Options都無影響它的全新年輕面貌o架！
V-shape面形
將兩間電鍍鬼面罩拉長，變成微微V-shape效果，再配合全新修正的頭燈線條，為整體外形增添動感的視覺效果。
動感下顎
擾流位亦作全新包裝，將生風口拉大改為梯形設計，還有感覺更立體的霧燈，令Corolla的外形具備斯文與動感。
PatPat收細
車尾亦有改動，收起尾翼、縮細尾燈、電鍍邊點綴延伸至燈位，幫手搶鏡。
斯文得體冧年輕OL
就算對車有幾唔熟悉都好，都肯定聽過Corolla這名字，由66年第一代至今，44年依然當紅，全憑多年來一直有平靚正首選的口碑。以往的用家主要是求經濟實惠的爸爸級居多，比較單一化，但隨着時代發展，凡事講求外形的年輕新一代才是目標市場，Corolla的名字及形象更需要歷久常新保持青春。繼07年推出第10代之後，今年再改頭換面以Facelift版上場，當中最大改動莫過於車頭及車尾設計。
內櫳不失豪華
要攻打年輕行政人員市場，內櫳不可失禮，雖然陳設未算豪華，但簡潔裝潢感覺舒服。加上第10代車身加大碼至長4,540×闊1,760×高1,465mm，內櫳空間充足，坐在豪華版獨有的米白色真皮座椅上，舒適度不遜於豪華房車。
ToyotaCorolla規格
引擎：1,497c.c.直4DOHC
馬力：109ps/6,000rpm
扭力：141Nm/4,200rpm
傳動：4前速自動波，前驅
售價：$194,940（豪華版）
查詢：23054555（皇冠汽車）