"莊家唔信紐記起孖"
上周末「其他」波膽開不停，馬後炮睇其實參考性唔高，車仔對住豆腐防線嘅韋根真係似打機；黑池鬥攻阿仙奴盞死；至於紐記大炒維拉更應該抹咗佢，你睇吓維拉周中歐霸盃出局，證明隊中冇人相信預備組領隊教得掂；唔怪之得紐記今天作客狼隊，莊家死都唔信前者贏多鋪啦！
"曼城季初又係咁勁"
利物浦作客對曼城竟然冇得抽，輸成咁真係極為意外嘅戰果，不過球迷們唔好咁快又好似上季咁，勁煲曼城去到攞聯賽冠軍咁巴閉；英超水準之高係成個league，唔係一隊波；互有勝負視等閒，賠率差距太懸殊，小心翌仗追寶尾。我唔敢話明天曼城作客贏唔到新特蘭，但1.72倍客W太誇，兩個策略，睇過賭走地入球大細；尤其曼城真的踢順風波，下半場中後段加注入球大值博率高。太多好手，三個後備換入嘅攻擊戰將必不留手；另外，梗係我鍾意攻嘅大波膽啦，兩邊「其他」廿蚊先試一注何妨？
"冧巴吐大肚腩"
曼城場波，場邊男人嘅吸引力，似乎攝影師大哥捕捉得好好；蒙蘇當然係靚仔又有錢，企起身拍手掌都斯文過人，再見到看台上風采依然嘅「大力水手」林巴度。不過完場後今屆被文帥聘用嘅助教柏列，同另一位老牌副手利記李森美握手；再想想車仔副手、另一前英格蘭中場名將韋健士，點解幾位冧巴two都有個大肚腩，話晒係一代名將，日日有陪練都搞成咁，唔通英國啲啤酒特別易肥？
"又係鯨魚開殺戒時候"
上周重注鯨魚得手，我說過佢哋專恰弱旅，證明上周手下敗將飛腳其實幾流；但今周迎榜末不死鳥，更流，熱W我興趣真係唔大，上周贏3:1有13倍，今次賠率乏味更要攻波膽，最多買夠三個，3:0，4:1，5:1。好友Ｔ，鯨魚放領咯，爽唔爽？
"潛行凶間睇完再睇"
終於有假放，一次過滿足咗好多好多願望，執好間屋，仲有包括成個月前睇過、今次再睇唔使同人迫，同好友可以舒舒服服享受嘅《潛行凶間》；睇多次更覺好睇，佈局、對白同想像空間更大，回味不已；上周自己買中保頓贏韋咸3:1呢個28倍波膽，證明首戰捧佢哋場開0:0未減對對隊波嘅信心。保軍陣容變動不大，個別主力包括中堅加里卡希爾、中場賀頓同前線李青龍有頗大進步空間，新加入嘅保國快馬柏度夫同上力嘅瑞典箭頭艾文達令攻擊增強；對手伯明翰難望有上季驚喜，追佢死冇蝕；明天35歲嘅卡爾同32歲嘅巴利費格遜又會擔正；唔係隻隻老馬季初都有火，保頓上盤可捧，波膽試吓3:1，4:1，今周要再食大茶飯，如《潛行凶間》，重溫舊夢！
文：蘋果波神
語錄：英超勢均力敵，表現起伏大因對手不同，曼城作客未必及主場，但保頓贏完返主場仲有不俗賠率，呢個「保」追得過！