菲律賓總統唔聽特首煲呔曾電話，搞出一場外交羅生門，冇理由特區首長急call都唔回應，有網民發現曾蔭權國際知名度可能真係太低，菲律賓總統府可能真係唔知佢來頭，懶得聽電話。
電視台粗疏唔求證
有人發現加拿大電視台報道菲律賓脅持人質慘案時，竟然將煲呔當做旅行社老闆（TourOperator），咁樣降呢法，令人睇到O嘴。有網民指呢個同煲呔國際知名度低無關，只係電視台新聞報道太粗疏，連基本求證工夫都唔做，八方噚日發現，電視台已把網上片段更正。有人更指有澳洲電視台將保安局副局長黎棟國個官銜誤稱做香港特首，可見事事旦旦，並唔係香港電視台獨有嘅作風。
打電話羅生門餘波未了，煲呔噚日同立法會議員見面時稱，香港同菲律賓都係APEC（亞太經濟合作會議）成員，領導人互通電話唔涉及違反外交常規問題，呢個係APEC成員之間嘅協定，同國家外交禮節無關。