四川省著名民運人士、作家和《○八憲章》首批簽署人劉賢斌，九年牢獄生涯結束唔夠兩年，今年6月底又被四川省遂寧市警方以「涉嫌煽動顛覆國家政權罪」刑事拘留，7月6日正式逮捕，「我是劉賢斌」香港關注組多名成員，噚日到中聯辦抗議，要求中國當局盡快放人。
遊行常客古思堯噚日亦有出動，八方見佢右腳膝頭紮咗紗布，要用枴杖輔助行路，頂住腳傷都要示威。阿古話幾日前義務做一個小工程，點知有人冇手尾，冇冚好一個水箱蓋，佢踩落去時扭傷，膝頭哥腫咗，已經睇咗幾次跌打，噚日稍為消腫，所以同戰友一齊去中聯辦。阿古稱休息多幾日應該康復，仲話自己腳腫好濕碎，「同內地異見人士無辜入獄比較，我哋喺香港幫佢哋發聲，做嘅只係好小嘅事」。