煲呔一面為菲律賓慘劇善後，一面為10月施政報告做工夫，噚日繼續就施政報告聽議員意見，多名獨立議員去政府總部會煲呔，包括退出白鴿黨、首次以獨立身份赴會嘅鄭家富。
議員講對施政報告意見，獨沽一味要求派糖，阿富都唔例外，仲加咗料。佢早前趁暑假到以色列朝聖，加上係天主教徒，佢話日前祈禱時，忽然天人感應，決定喺交畀煲呔嘅施政報告建議書上，寫上一句《聖經》經文：「凡你們對我這些最小兄弟中的一個所做的，就是對我做的（瑪25:40）。」
勸人唔好感情用事
呢句經文果然引起煲呔注意，據講會上阿富同煲呔辯論如何解決隧道塞車問題，阿富堅持政府買回西隧再減價最work；煲呔亦始終如一反對買西隧，語氣強硬咁反駁：「唔好成日話買，乜都買，政府邊有錢？」
若然係平時，煲呔肯定斬多幾両窒多阿富幾句，噚日卻忽然收火，好客氣咁同阿富講，「唔好感情用事」，隨即喺衫袋抽出一張卡送畀阿富。阿富一睇，發覺原來張卡係煲呔用嚟平息怒火嘅德蘭修女箴言，「裏面有10點，話世界好多唔合理嘅人，有唔係好和藹可親嘅人，不過最緊要自己做好，原諒其他人」。
避談工人權益問題
呢張箴言卡煲呔隨身攜帶貼身而藏，想發火時就拎出嚟睇睇，有次喺立法會被議員激嬲，都係靠張卡保持冷靜，呢次送畀阿富，相信係勸阿富唔好咁激動，至於係咪想叫阿富唔好再嬲民主黨支持政改方案，就要再參詳吓先有分曉。
阿富接過張卡打蛇隨棍上，同煲呔講既然大家都係教友，應該互相勉勵，「勉勵」煲呔餘下任期「要做好呢份工」，坐喺旁邊嘅李卓人搭訕話自己都好虔誠，卻遭煲呔質疑：「你都有去聖堂？」阿人揚言「我啲《聖經》勁過佢，所以佢即時收聲啦」。又同煲呔講，不能代表神去批判人。阿人又透露，會上追問煲呔幾時處理最高工時同勞工假期等工人權益問題，煲呔卻稱07年競選政綱冇提呢兩樣嘢，表明未來兩年只會按政綱辦事；既然如此，阿人叫佢唔好推23條立法，因為07年佢都冇講呢樣嘢。
mailto:[email protected]