由寰亞電影同上影廠合作投資嘅NBA題材電影《神奇Amazing》上個禮拜已經開拍，男主角黃曉明之前已經同NBA球星懷特侯活（DwightHoward）做過對手戲，噚日就輪到馮德倫同另一位球星、綽號小甜瓜嘅安東尼（CarmeloAnthony）一齊埋位拍攝，等到下個禮拜連魔術手莊遜（MagicJohnson）都會去埋上海加入演出。
球場變矮仔
馮德倫噚日同安東尼拍完對手戲後，佢接受電話訪問時話：「今日只係拍文戲，聽日先拍打籃球嘅場面，所有NBA球星都係做番自己，好似今日嗰場戲就係講NBA球星安東尼專程嚟到中國教我打波，佢一啲都冇怯場，演出仲好自然，因為做番自己應該唔會有難度，安東尼都幾nice，不過同佢企埋一齊，我就變得好矮細。」
早排徐若瑄去日本拍廣告，馮德倫專程去日本旅行，咁啱俾狗仔隊影晒相，證明佢哋兩個仍然喺埋一齊，噚日喺電話問起馮德倫呢件事，佢話：「我去日本玩，佢咁啱喺日本做嘢，咁朋友一齊見吓面好平常啫！」