台灣殿堂級歌手費玉清去年喺紅館開個唱，今年佢會重踏紅館，下月5日舉行一場個唱，最貴門票賣780蚊，盡顯身價。原來計計吓，費玉清單喺台灣8年嚟加埋開咗100場演唱會，聽聞粗略計都賺咗1億台幣（約2500萬港元），佢賺錢之餘，每年都會捐1000萬台幣（約250萬港元）畀10個慈善團體，將歌迷對佢嘅愛再幫助其他人。提到7月佢喪母之痛，費玉清話已收拾好情緒，如期完成各地嘅演唱會。