巴塞隆拿前日主場同AC米蘭爭甘柏盃，與其話係爭盃，不如話係朗拿甸奴喺巴塞隆拿嘅遲嚟告別賽。當「細哨」下半場末段被換走接受萬人拍掌，到完場後明明巴塞捧盃，都將個盃送畀佢以表揚佢多年嚟對巴塞嘅貢獻，場面咁感動，唔怪得「細哨」其間都忍唔住眼濕濕，淚灑魯營。
汗衫寫「巴塞，我愛你」
呢個一年一度，以巴塞前會長命名嘅盃賽，查實只係傳統拍跳活動，但今年因為係朗拿甸奴離開巴塞後首次返到魯營，令比賽變得矚目。唔少巴塞球迷，賽前喺網上整合「細哨」以前喺巴塞嘅威水片段，到佢入場，發覺場內唔少感激橫額、掌聲歡迎呢個昔日巴塞球王。連盛傳同佢不和嘅前巴塞會長拉樸達，一樣拍晒手掌。
去到比賽77分鐘，AC米蘭教練艾基利好識做換走「細哨」，等佢接受在場人士送別，「細哨」行行吓就除咗件球衣，除剩嗰件汗衫就寫上「巴塞，我愛你」嘅字句。當時佢成面水，本來分唔清係眼淚定汗水，但見佢最初仲展示招牌笑容，面容慢慢開始「嗱」住，又隱現淚光，想像到唔止流汗咁簡單。講到尾，「細哨」曾為巴塞屢立戰功，事業高峯就喺呢間球會度過，往事如煙，點會唔感觸？
韋拿今場射入加盟巴塞以嚟第一個入球，而恩沙基其後窩利入球靚波扳平，不過由於「細哨」至係今場波主角，所以兩個鋒芒盡被掩蓋。
佩奧爾代表送上獎盃
當巴塞互射12碼勝出後，另一感人場面出現，隊長佩奧爾代表球隊將個盃交畀「細哨」，意思係將榮譽盡歸「細哨」。有傳巴塞想「細哨」收山後返歸做總監，大家關係咁好，唔難啫。
話時話，「細哨」今場波周不時同伊巴謙莫域咬耳仔，唔知係咪游說佢加盟AC。巴塞教練哥迪奧拿擺明唔多想要伊巴，AC就恨得發燒，假如「細哨」串演紅娘能夠玉成呢單轉會，豈不妙哉。