兩個少女跳出香港了。
16歲嘅張菁雅同18歲嘅卜瑋宣，一齊獲得享負盛名嘅俄羅斯莫斯科大劇院芭蕾舞學院（TheBolshoiBalletAcademy）取錄，9月1日就會入學，係學院歷來首兩名全時間進修嘅香港學生。
菁雅同瑋宣學跳芭蕾舞都超過10年，前者係瑪利諾修院學校中五生，後者09年畢業於DGS，入讀恒生商學書院，兩人都獲獎無數，07年同獲香港芭蕾舞超新星大賽銅獎。菁雅同瑋宣都係王仁曼芭蕾舞學校學生，校長王仁曼指兩人獲俄羅斯莫斯科大劇院芭蕾舞學院取錄，係香港芭蕾舞歷史上一大突破。
王仁曼：感到自豪
王仁曼又話對兩個學生有此成就感到非常自豪。今年係芭蕾舞學校慶祝學校成立50周年，兩個學生跳出香港，「為呢個大日子錦上添花，實在令我哋感到十分興奮」。莫斯科大劇院芭蕾舞學院成立於1733年，係全球其中一間歷史最悠久及備受推崇嘅古典芭蕾舞訓練院校，有一套全面、獨特嘅教學法，強調力量嘅運用、鑑賞音樂能力、清晰流暢動作同個人表達技巧，好多著名芭蕾舞家都曾喺度學習、進修，以能夠進入該學院殿堂為榮。