花旗股市受新屋銷售差勁嘅數字影響，前晚繼續受壓，道指又一度跌穿10000關，但最後再失而復得，企喺10060收市，倒升19點，有機會喺現水平打底部署反彈。
港股貼近100日線整固，恒指全日波幅狹窄，高低位相差只係大約100點，收報20612，跌22點，算係靠穩，兩大成份股滙控（005）同中移動（941）都有掉頭炒迹象，日內港股走勢變化，估計會受兩大股份影響。
滙控C輪22682：滙控噚日報收76.90元，升0.7%。股價連續兩日現陽燭，技術走勢改善，料會上試77.80至78.40元阻力區，破位有機會上試83元，可以諗吓隻C輪22682。
隻輪現價7.9仙，2011年6月27日到期，行使價75元，溢價7.8%，引伸波幅28.4%，槓桿率9.7倍（有效5.4倍），正股升上83元，22682睇11.9仙，升幅5成，正股跌穿74元就沽咗隻輪。
俊樺