薛凱琪（Fiona）、周柏豪同廖啟智噚日喺薄扶林伯大尼堂為新戲《上海外灘》拍煞科戲，提到噚日全港為菲律賓人質死者默哀，Fiona話到片場已過咗8點，不過所有人都有默哀，對於有遇害港人嘅遺體喺菲律賓竟然俾人揭開影相，Fiona直斥荒謬：「呢個係基本常識，要尊重，就算家人揭開媒體都唔應該影，我唔相信登出嚟讀者想睇。」Fiona話呢幾日睇報道都會喊，佢認為鄭秀文講得好啱，應用愛包容和支持所有受害者。