各位巴打，喺人浮於事嘅香港，如何保住飯碗得來又不失霸氣呢？廣播處長黃華麒任期剩番唔夠半年，佢有冇得續約留任，政府高層仲未有聲氣。唔知係咪見勢色唔對，黃華麒最近會見傳媒，大賣膏藥，自我表揚過去兩年來嘅業績，求續約之情，相當露骨。之但係，可能佢又驚住萬一冇得留低，咁樣表露心迹會瘀爆，所以鄭重鋪定後路話，佢至今都未決定係唔係續約。
港台員工唔多撐
黃處長嘅霸氣求續約宣言係咁嘅：「喺我任內嘅呢兩年來，香港電台堅持住講良心話嘅原則，報道真相。本人仲將港台嘅節目質素提升，加強創意，例如《功夫傳奇》，以全新嘅技巧講故事；又好似處境喜劇《有房出租》，反應良好。我仲將港台節目國際化，同國家地理頻道合作，資助本地導演拍攝紀錄片……」
台長咁樣公佈業績法，自詡省靚港台招牌有功，唔係為咗續約，講都冇人信。但係身為台長，又點可以公然跪求續約咁cheap？於是佢又幫自己搵定下台階，佢話政府到家都未同佢傾續約事宜，連佢自己都未決定係唔係會接受續約。講到呢度，黃華麒啲霸氣即刻返晒來，眉宇之間仲流露出一種去留肝膽兩崑崙嘅氣勢，八方聽到，頓時汗流浹背。
講真，保唔保得住台長一職，唔輪到黃華麒話事，最慘係佢班手下都唔多撐佢。由港台員工組成嘅「撐港台運動」噚日就發聲明，怒「扯」台長一巴。聲明話，政府日前以大石壓死蟹之勢，頒佈管下不管上嘅《香港電台約章》，為箝制港台預設陷阱，黃華麒作為港台總編輯，理應竭盡所能捍衞港台編輯自主，但係佢耳中似乎只聞上司聲，匆匆簽署約章，令港台員工感到憤慨同極度失望，亦令人質疑黃華麒是否適合領導港台員工，履行公共廣播責任。
朋友批死做唔長
不過八方咁睇，敵人嘅敵人就係朋友，你班港台員工咁多齮齕，反而益咗黃華麒，曲線撐佢續任。黃華麒話，兩年前出任廣播處長一職，有朋友勸佢唔好咁儍，仲批死佢會打橫離開廣播道。呢位真心朋友會唔會一語成讖，好快會揭曉，大家食住花生等結局喇。
mailto:[email protected]