香港人愛旅行，近日諸事不利，似乎不宜出門。白鴿黨人上星期拉大隊到台灣，副主席單仲偕係團友之一，不過佢以「眾所周知」嘅原因，拒絕跟大隊坐華航，自己坐國泰機去台北。
點知當日國泰機唔知甚麼原因要押後起飛，如果改搭另一班機，就會落後大隊，唔可以參加訪問行程，佢話晒係副主席，離隊缺席似乎不是太好，因此當機立斷，毅然決定改搭華航，懷住悲壯心情，將生死置諸度外啟程到台灣。
單仲偕改坐華航都唔係話改就改，要勞師動眾幫佢改機位，由於行李已送上國泰航班，甚至要搵中華旅行社幫佢通知航空公司，將其行李由國泰機送上華航機，咁多轉折，貴人自擾。