香港經歷咗黑色一星期，大家對血洗旅遊巴慘劇仍然歷歷在目，前高官馬時亨太太王培琪搞嘅基督教組織「全城更新」，即時行動，聽日喺中環遮打花園舉行馬拉松式祈禱活動，為馬尼拉悲劇死傷者祈禱，祝福倖存嘅人。
活動由下午3點鐘開始至晚上9點鐘，歡迎大家隨時加入，據八方所知，大會可能會請埋最早獲釋嘅兩名人質李奕彪同佢太太徐鳳群一齊參加，因為佢哋都係基督徒，深信今次逃過一劫係神嘅安排，既然如此，相信佢哋願意再講一次神迹，同大家分享心情。全城更新連續六年喺香港舉行全球祈禱日，年年都有好多高官參加，聽日個祈禱會，相信都有唔少高官出席，悼念死者。