以前DJ見聲唔見人，說話有內涵、主力播好歌，單憑聲音已建立形象和Fans。相比家，好多人話80後缺乏創意、做事又被動，語氣多負面。但80後DJ阿Bu、陳強顯然是少數主動的80後，兩人為了完成做DJ的夢想主動出手，對於社會上的漫罵聲，他們以行動作出反擊！
記者：林佩婷
攝影：伍慶泉、部份相片由受訪者提供
阿Bu髮型及服裝：MarvinLin@IFCILCOLPO、Adlib
阿Bu：因為阿芝入商台
細個玩口水俾屋企人叫佢做阿Bu，F.2見電視唔啱睇，跟住就轉聽電台，當時正做緊芝see菇bi，覺得搞笑又好聽，連四十幾歲師奶都要打電話上去問嘢。第日同朋友講起，原來個個都係Fans，仲推介埋《森美變態樂園》等節目，自此下午至夜晚長時間係咁聽，達到瘋狂程度。「最記得03年沙士，又唔使返工，直情開住PSP打機聽收音機。可能最早聽開阿芝同森美，所以最鍾意佢兩個，簡直覺得佢哋講嘢有魔力。」
後來阿Bu參加商台《903發開口夢DJ選拔》，贏得冠軍入行，連自己也覺好彩，「當時有三組，我參加『深度組』，面試交份三分鐘Demo，索性起個題講咩叫三分鐘。之後評判面試講一分鐘，我又定為咩叫一分鐘，點知竟然講唔晒，諗住衰梗又俾我入到圍喎。每次比賽唔知點解，我加入嗰組總係勝出唔使淘汰，於是被人話係陪跑王，最後仲贏埋。」
終於學識「想講乜」
當然，贏出唔代表一定有得做DJ，最初阿Bu都是由PA做起，但他笑說入到去做清潔都開心。最初幫卓韻芝《五天精華遊》負責搜集資料，更進行地獄式訓練。「阿芝每日叫我交篇稿，今日要批判性、明日要Touch，後日可能批判加Touch咁，數量亦遞增上去。寫得好當然會讚，但都試過話我：『睇完第一句就知唔掂！』由此學會原來每份稿第一句話好重要。寫咗無耐阿芝又叫我錄Demo，結果出來叫我再錄過，仲話如果我份稿100分，錄就得50，林海峰錄就120分，嗰吓覺得瀨嘢。」錄了成個月沒起色，於是阿芝就將他交給出名字正腔圓的前輩陳嘉熙，上堂第一日就讀鹹古。「陳嘉熙一手拎張風月版俾我讀，我咪照讀，原來裏面好多故事好生活化，好似男人飲醉酒見個女仔靚去調戲，用語貼近生活，要諗點靈活演繹。讀得多自然知個技巧係點，知咩語氣咩情緒可以牽動人。」
入去幾個月就開咪，感覺做得好差感到失落，他說現在不敢再聽番，當中他學會對每件事都要有看法。「第一次開咪覺得自己講嘢無Point，跟住學識對每件事都要諗多啲，好似睇完場戲諗點解好睇、食完餐飯會諗點形容，總之每樣嘢都問自己『想講乜』，以後做節目都要令人明白自己唔係亂噏。」經過不同節目的磨練，現時在《1872遊花園》和余迪偉、鄒凱光合作，兩位皆是前輩，三人負責崗位都不同。「余迪偉善於分析聽眾問題，鄒凱光對男人嘢好熟。我就善於做娛樂工作，又或者o靚仔題目啱我講，每次做節目都好開心。」
出雜誌改變世界
除了錄節目，他和陳強的《人人人》，每次都會做一些社會題目，有時拍短片讓社會大眾更關注，更推出了刊物《白卷》和《黑紙》，這都和他希望改變世界有關。「最初做黑紙可能只係想同陳強、林日曦聯誼，個名諗咗《逢星期五搞啲嘢》，將內容結集成書。後嚟發現大家都有工作，搞得好大好難控制，就決定變成一月一期《黑紙》，到家出咗八期，每月主題主要圍繞三大方向：批判社會、Touch情懷同埋Gag。大家同喺商台訓練，對文字好執着，每人諗幾十句後逐句批判，甚至有時一個標點、一個「的」字都可以駁好耐。每份賣$1，根本無諗過賺錢。後嚟發現反應好好，就覺得有其他Bouns、社會功能，多人睇文字係件好事，有時喺fb、微博講意見，讀者更創出藍紙、白紙、信紙等作品，種種反應都可以反映大家對社會睇法。至於《白卷》可以話係本反通識雜誌，吸引健吾、陶傑等講通識科的荒謬。呢啲意見可能會引起爭議，但我哋覺得有爭議即等於有人關注，諗多咗成個問題，即使未有解決方法，但呢啲概念對成個世界都好重要。」
1.09年尾為10年頭的叱咤頒獎禮拍場刊、作主持。
2.05年參加商台《903發開口夢DJ選拔》，最終贏得冠軍。
3.《五天精華遊》中的禁室培育每星期都要諗個題目學習教給聽眾，他說往往星期一時是儍仔，經過看書搵資料，星期五就變專家。圖為08年其中一個題目：學Footbag。
4.因節目關係，08年《球來球往》展開英國之旅到了奧脫福。
5.08年跟阿芝、Gigi、Sammi到老撾作饑饉之旅。
6.入行受卓韻芝訓練：「阿芝好肯教人，有讚有鬧，會知道自己衰咩再改進。」
7.今年7.1黑紙會發起示黑句遊行。
陳強：多得林夕鼓勵
被阿Bu喻為更瘋狂的電台Fans陳強，細個阿媽朝朝開電台當鬧鐘叫醒，由港台《晨光第一線》至商台《森美變態樂園》，對每個台的節目都瞭如指掌。提到他的F.2偶像森美，讚美有如滔滔江水連綿不絕。「大哥（森美）有抱負有信念，有趣得嚟可以好有深度，議論中又有Point，幽默中有智慧、智慧中有趣味，希望有朝一日變成佢。」
Year1見電台招募DJ選拔，陳強參加了但無入圍。跟住見廣告撰稿員，即刻度「廿三條」宣傳橋寄去，意外獲得高層林夕接見。「嗰刻只係諗如果咁難嘅『廿三條』都俾我Sell到，就肯定有創意。當時創作部阿頭係林夕，佢見完我後話我未畢業唔請得，走前講咗句『呢個世界無懷才不遇，有能力就做得到』，令我印象好深刻。」雖然見唔成工，但他維持每月寄份創作橋去商台。這份努力沒有白費，之後廣告人曾錦程看到他的作品，請他到廣告公司兼職；機緣下又被介紹到商台廣告部做撰稿；更因俞琤叫他錄Demo，聽完後派他到二台做PA，幫手搵資料、錄音，協助節目運作。「其實PA和DJ差不多，都一樣可以開咪講嘢，做幕後預備搵資料，都要有智慧先可以做得流暢，個腦要不停咁轉。」
跟住森美逃避森美
入台約三個月在《森美移動》正式開咪，在偶像森美面前，陳強覺得自己表現差勁，甚至一度想以「病」來逃避，最後用了年幾才能克服。「記得首次喺佢面前報天氣食螺絲，行埋個咪覺得有十萬人企喺前面勁心跳。有次暗地裏講『想病呀』，傳到森美耳中俾佢嘲笑問我係咪想病，我驚到走咗。最記得有次同森美、Leo開咪，被人問到無貨逼到埋牆腳，於是我講咗句：『講嚟諗住嘥吓時間！』Leo即刻話如果佢係聽眾一定好憎我。嗰陣真係每次放工即刻想走，又或者匿埋廁所、喺Office扮做緊嘢等佢哋走。」即使情況咁差都沒想過放棄，他說森美雖然控制不到個樣罵得兇，但亦教得最多，對他感覺好像老師又好尊敬。「人係會進步，習慣模式後自然漸入佳境，明白到要享受工作，研究點講會好啲，點樣令自己叻啲。」
上一代都有責
09年負責《你睇我唔到》訪問特別個案，陳強由最初無預期、驚搵唔到人，到現在年輕人主動找他講心底話，節目成功的他自言幫到人同時令自己學懂做人。「節目前足足做咗四個Demo先正式出街，可算近年最多。最初靠社工，後來做到口碑一個識一個。每個受訪者我都會同佢哋傾偈了解，因為佢哋係朋友唔係受訪者咁簡單。咁好反應令我好感恩，我唔係話要做到弱勢搵陳強，而係希望加強聽眾背後反思。好似援交少女性上癮，脫離後積極改變他人，以生命改變生命；又或者訪問的癌症病人已離世，覺得世上除咗絕症、死亡，無嘢係解決唔到，個人都會快樂好多。」該節目令陳強好多得着，但同時帶來不少爭議。「爭議不是問題，有爭議即係有人聽，無先至危險！好似林峯受歡迎都有爭議啦，做得件事就唔可以被其他嘢影響。」
有指新一代DJ無論在語文能力、音準方面都未能達到舊一代的要求，就連DJ的播歌責任也有所批評。陳強話世界不斷在變，電台把尺亦要變，「喺903，音樂都好重要，不過現時聽音樂途徑多咗，啲人唔一定聽電台來聽歌。世界變緊，無人可以質疑。至於DJ字正腔圓，每個人要求唔同，掉轉頭諗可能老師、家長的教法有問題，上一代教育有責任。再唔係覺得DJ有懶音都請，老細都要負責。」
8.每個《你睇我唔到》的受訪者都是朋友，節目完後也會聯絡。為免身份暴露，影相都要影背面。
9.07年做《森美移動》獻出多個第一次，例如上《勁歌金曲》做客席主持、出碟、開演唱會，圖中是在apm搞簽名會。
10.07年設計慈善帽替宣明會籌款幫助非洲兒童，定價$220等於當時一個兒童每月的生活費。
11.除了森美，教他最多嘢是喪DO男Leo（右），還跟他去學舞獅減壓，負責打鼓。
12.同期最Friend電台朋友是阿Bu，兩人一齊唱歌、拍短片，更出版刊物《白卷》和《黑紙》。
13.雖然好鍾意森美，但他說兩人做唔到朋友，因為佢似老師多啲！《森美移動》玩輸要受罰，這張相是佢輸咗要整水晶甲。
