譚兆偉是90年代本地球壇頂級球星，可惜場外生活一團糟，去年因債務纏身而服食過量安眠藥送院，繼而被揭發因沉淪賭海而欠債20多萬，妻兒離他而去。幸好譚兆偉獲陳炳安、高志超及潘文俊等前隊友幫忙，在剛成立的阿仙奴（香港）足球學校任教，在球場上的另一個崗位重新振作。
記者：曾雁平
攝影：黃冠華
教波 重新起步
有關譚兆偉的負面新聞不少，但曾與他在球場合作的隊友及教練，均盛讚他教波很用心；而阿仙奴（香港）足球學校成立初期，總監陳炳安及主教練高志超便決定找譚兆偉幫手，希望幫到他之餘，更期望這位一代球星能在教練工作上做出一點成績。
「始終要面對自己做過嘅錯事，承擔後果，錢慢慢還；係難捱，現在教小朋友好開心，希望將來有機會教甲組。現在靠教波同踢業餘波維生，遲啲去澳門踢7人賽，每場波有千幾元車馬費。另外，幫手教阿仙奴同業餘隊，搵萬零蚊個月，夠還債同生活。」
「現在轉型教波，其實教小朋友都開心，能夠令佢哋對足球產生興趣之餘，將自己過往學過嘅教畀佢哋；自己會視為呢個為學習期，因為我志願係做甲組教練。」
「上季初在四海流浪接替張匯做代教練，教得幾開心，初時球隊高層給我一定自由度，可以自己定陣容同踢法；以球隊有限人腳，能夠在首循環守在3至4位，成績算唔錯。不過，後來因同球隊高層意見分歧提出解約，希望將來有機會再教甲組。」
無知 沉淪賭海
球員時代，有關譚兆偉欠債傳言不絕，有說他因避債而經常轉換電話號碼；每次轉會也先要一筆簽字費，多番向球會班主求助，還試過連續幾日缺席球會操練。
「出道不久便開始賭錢，18歲踢甲組，攞到冠軍，搵到錢，冇憂愁；但球場外有點迷失，初期賭不是賭得太多，但後來身邊朋友又賭，開始沉迷。唔識都要賭，純粹為賭；至於波就覺得識，因為自己行內人，賭得比較大，當時唔識驚，因為人工可以還債。」
「但後來年紀大，收入比以前少，曾試過諗辦法解決；過去十幾年都是又還又借，又借又還咁，操練後又會諗番之後點算呢？但比賽不會受到這些影響，因為落到球場會唔記得。當時有人提我，包括黎sir（已故的黎新祥）同球圈朋友，只是無法自拔。」
後悔 失去家庭
譚兆偉與其青梅竹馬妻子育有3名子女，只是沉淪賭海，欠債不斷令妻子選擇離他而去；最終靠親人及對他不離不棄的朋友才重新站起來。
「最可惜係冇咗個家，現在大家分開住；諗番起都好可惜，本來好好哋點會搞到咁。有時仔女會問我點解唔返屋企，我都唔識答，好在身邊有好多朋友，教會嘅弟兄同Peter（黃興桂）等朋友同我講好多鼓勵說話，令我重新振作。」
「冇工作，家庭又有問題，唔知點做；讀書唔多，只識踢波唔識做其他嘢，最後諗埋一邊，這年半是我生命裏面最難過。有圈外朋友（黑哥、馬哥）識咗好耐，之前一直冇乜來往，知道我在醫院後打電話畀我，講番佢哋輸多過我好多好多，我欠人20萬，其實不是好大數目。Peter與我細妹成日同我講，人人都有錯，最重要起得番身，唔好再賭。現在個人醒晒，只係失去家庭，仲要令幫過我嘅朋友同班主失望，自己好後悔。」
譚兆偉小檔案
出生日期：17/09/1970（39歲）
位置：進攻中場
曾效球會：麗新、東方、流浪、快譯通、晨曦及傑志等
現職：阿仙奴（香港）足球學校教練
個人榮譽：香港足球先生（95年）、最佳足球明星（92-95）、最佳青年球員（89-92）