政府大搞工廈活化，屬於嘉華地產嘅大角嘴新型工廈SOLO推出之後銷情據講唔錯。好多人就係睇準大角嘴鄰近旺角，又係港鐵沿線。資深傳媒人程翔同佢太太劉敏儀，前幾日亦以170萬購入一個SOLO內單位。
有人送層樓畀佢
原本住喺元朗村屋嘅程翔，當然唔係諗住遷入工廈居住咁潮，更加唔係買入嚟炒，佢話自己同太太退休後，需要搵個辦公室做嘢兼且同外界保持聯絡，所以早前就扑槌買入呢個單位做office，暫時唔知幾時可以開張大吉。原本手持元朗村屋二樓連天台以及地下連花園嘅程翔夫婦，最近仲獲一位名為陳逢春嘅人送咗一樓單位畀佢哋，換言之三層村屋都係佢哋擁有。