息影女星夏文汐回流香港活躍起嚟，噚日孖住老友周美鳳到銅鑼灣置裝，首先到利園Anteprima揀衫，之後到附近利舞台hair整頭髮。夏文汐戴住墨鏡身穿黑色tee、緊身熱褲同高踭鞋，依然星味十足。
現場見夏文汐鍾情黑色連身裙襯黑色通花絲襪，記者趁佢離開時上前問佢係咪鍾情騷腳嘅打扮，佢笑笑口話：「通花喱士今年興。」記者大讚佢身形keep得好，佢就話自己要keep住做運動。
10月返內地拍戲
對於之前有傳夏文汐復出夥拍陳偉霆，接拍潘源良執導嘅《出軌的女人》，夏文汐表示套戲冇咗下文，佢話：「拖得太耐，導演之前忙世界盃，有同佢開過會，家未必接到，因為10月中有另一套戲喺內地拍，係內地演員，香港導演，自己唔想咁辛苦兩地拍，加上部戲有啲情節接受唔到，感情戲唔係好合邏輯，我唔拍呢個角色，大把人爭住拍。」