花旗股市走勢轉差，前晚道指一度跌穿10000點關，收報10040，下跌133點，沽壓再度增強。10000關會再受考驗，一旦失守，好大機會要下試9500。
港股噚日受花旗股市帶動下挫，恒指最低見20512，收報20634，雖然跌穿100日線，但只係相差10點，而且港股收市較低位嘅跌幅大為收窄，反映現水平有唔錯嘅支持，期指結算前好友應該會力守20500關。
領匯C輪23066：領匯（823）昨收22.05元，升1.1%。股價最高報22.40元，係上市以來新高，短線可能只會喺21至23.50元上落，但係全球市場資金多又冇出路，領匯派息率越嚟越吸引，中線睇26元，可以諗吓隻C輪23066。
隻輪現價31仙，2011年5月30日先至到期，行使價20.88元，溢價8.8%，引伸波幅36.3%，槓桿率7.1倍（有效4.3倍），正股見26元，23066睇59.8仙，正股跌穿20.80元就沽咗隻輪。
俊樺