迪士尼9月12日就5周年喇，即刻搵樂園市務總監陳國裕八吓，佢透露嗰日入園人士會獲贈紀念章，同日又發售限量300個嘅巨型襟章。迪士尼習慣每5年大搞一次開園紀念，所以今年9月16日開始嘅「迪士尼黑色世界」，仲破天荒因應節目新設計煙花表演，唔同以往「星夢奇緣」主題，燈光、音樂、高清投影機會喺城堡上營造嚇人氣氛，重點人物黑巫婆會突然顯現。下月入場嘅，可以獲贈3D鬼火立體眼鏡，戴咗望住煙花，會見到鬼火圖案。
特定日子搞黑色世界
萬聖節活動，梗係唔少得鬼屋，繼續有大街詭異酒店、森魔詭域，恐怕又要排長龍。唔想排，有樣新嘢啱你，美國小鎮大街會變成鬼鎮大街，鬼怪會偷偷匿喺街角、店舖隨時嚇人。睇開外國鬼片如猛鬼街嘅話會更加驚，因為美國小鎮大街就似戲中場景咁。班猛鬼又會突然一齊起舞，咁咪好似MichaelJackson嘅《Thriller》MV咁？
作為主題人物，黑巫婆會同埋《愛麗斯夢遊仙境》嘅紅心皇后，《白雪公主》嘅巫婆，喺明日世界搞「黑巫婆的士高」熱舞。佢三個都好鬼憎靚女，睇怕我到時都要化番個醜裝，遮掩自己嘅美貌，如果你都有咁嘅擔心，可以試吓新增嘅「整鬼化妝間」，會有專人替你化妝、戴假髮等，但就要畀250元起。
黑色世界會舉行到10月31日，但只喺期間嘅星期四、五、六、日，同埋十一黃金周嗰個禮拜舉行，大家唔好去錯日子，時間係6:30pm至11pm，入場費$228。
電郵：mailto:[email protected]
