想做髮型師，舊時要由洗頭仔做起。以前名髮型師剪的都是粒粒巨星，個個都是捱出來。近年雖有髮型課程選讀幫你快速上位，但兩位80後髮型師傅異口同聲話實戰好過讀書，近期的模同新上位明星客仔無疑幫了他們一把。
記者：林佩婷
攝影：楊錦文、伍慶泉、部份相片由受訪者提供
讀完設計從頭做起
通常見著名髮型師都是男性，Zap可算是少數有名氣的女師傅。從設計學院畢業，Zap偏偏選擇做髮型屋學徒，原因只為易入行。「當年即使讀咗書都好難入行，咁做髮型屋學徒唔使In，覺得又有型咪入去做囉。入行後發現自己勁鍾意紮頭，整出嚟好有成功感，工作時間又Free。」最初因仰慕KimRobinson進入ESPRIT，五個月後到HairCulture，兩年幾後又跳到Chin.G，一做六年。普通人可能四年升到師傅，她卻足足用六、七年，最大元凶就是未定性。「前兩年做學徒好貪玩，浪費好多時間。直至HairCulture突然調我去細舖，嗰刻真係好挫折就辭工。轉去Chin.G由低做起，頭四年都係Junior。好彩當時有個朋友點醒我，叫我唔好再嘥時間，你知啦女仔青春有限，要開始發憤。無人教咪俾師兄師姐紮我個頭從中偷師，再唔係自己拎個假髮嚟練。最初搵朋友個頭嚟試，唔熟梗係有烏龍，試過電到朋友個頭好似佛祖。跟住日頭做完夜晚上門幫人剪，再唔係去尖沙嘴夜場做Part-time儲經驗。」
雜誌編輯助我成長
做Junior時公司已派她四出接Job，除了剪髮，Zap的志願就是做個出名的紮頭師傅，除了幫明星如Twins整頭，更幫不同雜誌Fashion版整頭。她說幾年前遇到雜誌副總編Kat，可算是她的伯樂。「當時一星期有兩三日幫佢本雜誌版面整頭，每次最少三個，佢要求極高，諗嘢又天馬行空，我成日俾佢考起。最記得有次我紮個擯辮覺得超靚，點知佢一落嚟見到就話好憎擯辮，要我拆咗佢，嗰刻真係好唔開心，成日HardFeeling。不過我好感激佢，喺佢身上我學到超多嘢，以前做Junior點會有咁多諗頭，喺佢度我覺得每次好似要紮層樓出嚟，甚至可能加氣球等道具。最珍貴係同時間識到好多Model好多星，好似周秀娜、詩雅都係嗰陣識o架，佢哋之後都有搵我整頭，可以講當年因為咁，擴闊咗自己個Network。」
為首相夫人整頭
在Chin.G做了四年，通過測試成為師傅，到現在轉到XENTER，曾做過的明星有Twins、周秀娜、羅力威、詩雅、舊8模等多不勝數，還未計各種品牌的廣告。但要數最威水就是幫貝理雅夫人整頭。「上年貝理雅夫人來港，我有機會幫佢整幾日頭仲上埋報紙，仲可以好自豪咁同父母講自己有幾叻。以前父母基本上唔多理我做咩，嗰陣仲問我使唔使曬張相放喺屋企，真係覺得光宗耀祖。」跟一般髮型師長駐場不同，她更喜歡做熟客或拖住個篋四圍闖。「趁家後生可以拎住個篋出去行，好過到咗三四十歲更難行，唔趁家搏等幾時？」
不過做出了名氣同時，Zap亦曾受過白眼，「當時有啲雜誌風格走性感路線，有啲人會寸我做埋呢啲性感工作、意識不良，但我覺得都係一份工作，只要揸定宗旨就唔怕人攻擊。」現時的她都算小有名氣，但都說不可以鬆懈，依然拚命找機會進修。「台灣有本Fashion雜誌出嘅內容快過香港好多，我特登請朋友每期寄畀我，等我了解歐美嗰邊最新髮型資料。」
雜誌習作
轉足四間始跟明星客
剛升師傅無耐的Alex，同樣轉過四間店，每間都要由低做起，用了五年多先做到師傅。「十幾歲出嚟做嘢，清潔、大牌檔都做過，學識唔高最直接不如學門手藝，當時諗到做髮型師，因為洗頭唔使Interview。第一間喺寶勒巷，日日清潔完企喺Junior旁邊睇人點洗頭；跟住去咗ESPRIT，當年過萬呎地方覺得好有規模，升遷有制度，Treatment、Color、Highlight等定期會考試。初學時試過電髮變豬腸，或者負離子做到有少少散，俾個師傅鬧。」
捱了兩年幾升至吹頭，聽到外來的髮型師說外面的世界原來好大，例如出埠或幫明星整頭，未必要局限在店內；而且原來就算在ESPRIT升至師傅，外邊也未必承認履歷，於是Alex決定跳去Chin.G。「最初好忐忑，話晒之前已經搵到成萬蚊個月，去另一間由Junior$3,800做起，要好大勇氣，但諗吓自己仲後生可以搏。呢間有好多Artist、雜誌、廣告等工作，亦見到有名氣師傅，Set頭超靚。雖然由零開始，但日日有嘢學，每個星期更有ModelNight，師傅會教唔同技巧。入咗去三個月就有得跟師傅影雜誌，之後自己出去Set頭，晚晚練習連屋企人、朋友都拎埋做實驗品。」因為師傅Carr和其他師傅自己出去打天下，Alex亦緊隨轉去P.O.P，無耐升為師傅。
Salon越多入行者越少
說起明星，Alex說最初幫他們整頭好大壓力，因為整得唔好會直接影響自己名聲。「記得有次師傅有嘢做，我要頂上幫方大同整頭。對住出名嘅星自然有壓力，但諗到師傅叫得我做即是對我有信心，即刻個人定番啲。」最大挑戰性，係早前幫陳柏宇唱片封面整頭，「其他製作人都好有經驗好出名，大家見我咁後生都可能有啲驚。尤其初初整出嚟好似唔多得，幾驚甩轆呀，好彩最後都整到佢哋滿意。」
現時年紀輕輕的Alex已幫師傅做過多位明星，如Angelababy、方珈悠、陳柏宇、馮曦妤等，他說沒有一個頭髮覺得最滿意，因他說凡事無完美，永遠覺得未夠，人才會進步。身為80後，Alex有時都覺得入行的年輕人唔多捱得。「可能家啲家長太錫小朋友，幫佢哋安排好晒，唔使咁早捱。Salon越開越多，但入行嘅反而少咗。雖然市場上已經有好多知名髮型師，但我覺得只要想做就一定有得做。」
