有GenY（即Ｙ世代）問，一間公司點先可以上市o架？點解我見到有啲上市公司好像大部份股份都唔放出來畀小股民買，咁個股票係咪唔買得過？公司上市嚟做乜？
答案係只要你嘅企業符合香港交易所（388）上市條例要求嘅業務經營模式、行業監管法規及盈利紀錄要求，就可以嘗試遞表申請於交易所掛牌上市。當然獲批上市與否要視乎港交所上市委員會及證監會滿唔滿意，擬申請上市公司對有關部門與監管機構就公司所屬行業及財務數據內容所提問嘅答案滿唔滿意。
公司上市旨集腋成裘
近年唔少上市公司掛牌前已搵咗風險投資基金、天使基金，甚至私募基金，於業務仍未爭取上市前以極廉宜價格入股，企業有了資金水源自然就更快壯大，加快上市之路，小股民財力不足，當然係公司上市後才透過市場買入，雖然買貴咗，但勝在以交易所平台落盤，經營數據亦較透明兼有監管機構幫手隔過渣，較上市前隨時就算有大水喉都未必湊得大兼成功上市嘅風險低。
至於上市公司股票買唔買得過始終要視乎個別公司業務及數據之吸引力有幾大，及與市場上同行業競爭對手之估值比較。上市目的難一概而論，善良嘅公司上市旨在與大家分享成果及集腋成裘再把生意做大做強，立心不良企業則在上市前已賺夠趁市旺盡地一煲變相套現。
以上答問就係從一個專為強化本地年輕一族理財概念而設的網站內「專家教路」欄目的其中一問，有統計預期，到了2020年，佔人口24%之GenY將成為就業市場的最大支柱，但統計同時指出，74%GenY都有既定投資目標，但27%GenY對何謂正確理財觀念很模糊。想分享理財知識及對相關理論有疑問的GenY，不妨上hkyfi.com.hk參考，網站上亦有不少名人嘉賓與你分享他/她的理財態度，透過這些訪問與分享，希望能強化你的理財知識。
胡孟青
獨立股評人