香港遊客喺菲律賓被殺事件後，唔少官員都取消外訪交流活動，不過財政司司長曾俊華星期六首次去台灣訪問，八方聽聞鬍鬚曾諗完一輪之後，最後都決定如期起行，事關此行有實際工作需要，唔去唔得，但會調整吓行程咁話，唔會遊山玩水，盡量低調。
鬍鬚曾此行係為搞咗差不多成年嘅港台經貿、文化合作打開大門，而且今次係台灣嘅「台港經濟文化合作策進會」同香港「港台經濟文化合作協進會」第一次開會，雙方已經搞咗好耐，曾俊華亦都係代表政府、以協進會名譽主席身份出席會議同致辭，所以最後都決定如期成行。
有政府中人話，今次鬍鬚曾去台灣將會盡量低調，八方暫時睇到政府發出嚟嘅行程，淨係有佢出席星期六兩會舉行商界午餐會、出席兩會首次會議，同埋參觀台灣企業、文化同旅遊觀光設施，冇其他特別安排，亦冇乜嘢私人觀光活動，總之盡量低調。