菲律賓發生脅持香港人質事件嘅消息，大約係前日中午之前傳到香港，好多記者行家喺事態仍未急轉直下之際，已經執嘢上飛機，去到現場即刻做嘢，聽聞好多人踩通宵，唔好講話瞓覺，凉都冲唔到。記者協會收到行家反映，有同業目擊人質遇害經過，情緒困擾，雖然第二晚終於可以撻落床，點知失眠，不斷諗起血腥畫面。
記協呼籲同業主動關心吓去咗菲律賓嘅行家，互相扶持，打算遲啲搞個工作坊，分享吓行家處理災難新聞情緒問題。記協早前出咗本災難應變手冊，有好多貼士，例如避免怪責自己、唔好隱藏哀傷感覺等等。八方祝願各位身在菲律賓嘅行家盡快平安歸來。