好天收埋落雨柴，阿媽教我未雨綢繆積穀防饑，因為花無百日紅，人生際遇更難料。洪松蔭、盧冠廷、李健和三人當年各有成就，如今轉行各自開展人生新階段，船到橋頭自然直，不做老本行一樣撈得掂。
記者：葉雪芯
攝影：林栢鈞、王文忠、周旭文
盧冠廷：
怪病促成有機人生
「呀哈，我要飛往天上，呀哈，找那溫暖太陽……」盧冠廷當年消失娛樂圈，全因一場怪病。
他說：「1996年我身體出現敏感症，一瞓覺就全身麻痹兼頭痛，每隔15分鐘就要起身郁一郁，即係等於全晚無瞓過，咁嘅生活過咗四年，辛苦到想自殺，停止晒所有工作。」停工不完全因為病，還有1997年的金融風暴，「當年主要做電影音樂，一來自己病停咗一段時間無接project，人哋自然唔搵我，二來金融風暴打殘電影圈，好多廣告公司、電影公司老闆欠我幾十萬唔找數，咁搞法唔做好過做。」無開工，但盧佬儲落積蓄，生活仍不成問題，為怪病他看過很多醫生，但沒一個醫生能治癒他，直至一日他無意看了一本有關化學物質影響生活的書，再上網做資料搜集，相信自己患了化學敏感症，但旁人不相信他這個發現，「好唔忿氣，無人信我，我去睇醫生，醫生話我自己心理作用諗埋一邊，好多朋友話我黐線，又叫我睇心理醫生，太太唔信我，成日同佢鬧交。」那刻開始他決定自救，放棄一切接觸到化學品的生活，開始回歸自然過有機人生，2000年在西貢開了一間有機生活店，專賣有機產品，太太負責管舖，自己則全力投入宣傳環保知識，「當初開店完全無諗過賺蝕問題，你用唔用有機、做唔做環保，我無得控制，但我知道化學工業禍害人類，我要話畀人知呢方面知識，呢個係一個使命，係責任。」
對音樂仍有火
「快樂老實人，敢想敢當敢說每段老實話……」名曲《快樂老實人》，絕對反映到他的率直性格。
在香港這個不重視環保的地方推動綠色生活，自家開店經營這冷門生意，的確困難，但他沒怨言，「綠色生活救咗我一條小命，呢十年過得好有滿足感。」還會做音樂嗎？「當年工作好麻木，日日對住電腦密封式不停做嘢，無所謂人生。不過我對音樂仲有火，而且有大把貨，我已經作咗十首歌，收埋咗，betterthan以前作品，我敢講自己水準有深度，aboveaverage，不過我要搵到有心人幫我出碟，唔淨只做本地發行，我想做到international！音樂喺香港好難做，好音樂出唔到嚟，市道越來越差，出唱片，唔蝕都算偷笑。」
洪松蔭：
單車名將賣保險
講香港單車代表，80後只認識一個黃金寶，沒人記得洪松蔭。
1979年開始接觸單車的阿松形容自己小時自卑，一切自信心都由單車而來，「細個嗰陣，俾一個姐姐話我大細眼單眼皮唔靚仔，大個識唔到女仔，有日行街見到個男仔踩單車全身fullgear，好有型，我發誓以後要踩得似佢咁有型，自此情迷單車。」與朋友仔一起踩單車，阿媽大罵他死飛仔，他試過離家出走，「我鬥氣，日踩夜踩搏命練習，想做啲成績畀佢睇，要比賽證明自己唔係玩玩吓。當年一見比賽就報名，完全無諗過做乜嘢香港代表。」七十年代末，還未有全職運動員，他邊打工邊比賽，朝早練習下午上班，為遷就比賽經常轉工，「大大話話轉過四五十份工。」1981年他首次代表香港出賽，先後出席兩屆奧運、三屆亞運，成績驕人，更於兩屆一百公里亞洲單車錦標賽隊際賽奪銅牌。
單車運動員與保險從業員，大纜扯唔埋，但其實他投身保險業已經廿幾年。初入行時，不太多人知道他是香港代表，「唔好以為我有好高知名度，以前做運動員邊有人識，家運動員地位高好多。」現在已做到區域經理的他怎入行？「話說當年我買咗一份保險，不過一直都唔知保險係乜，一心打算儲錢。1985年我仲邊返工邊代表香港出賽，當年我做電單車速遞員，點知返工炒車，頭部重創昏迷五個鐘，以為入院費要自己搞掂，點知原來我買嗰份保險有得賠，當時個經紀順勢叫我轉行做保險，我諗，都係時候為自己打算一下。」
有付出自有回報
單車界名將，23歲正式入行賣保險，大抵運動員都有股硬頸拼勁和超強心理質素，他很快就上手，「頭幾單生意都係朋友幫手買，我問朋友究竟聽唔聽得明我解釋份保單，佢哋坦白話：『我真係唔知你講乜，純粹因為幫你而買。』即刻知道自己弱點就係講嘢唔叻，所以每日對住塊鏡日日讀報紙，學抑揚頓挫令說話有說服力，練說話技巧同邏輯，學習表達自己。我好搏命，日做十二三個鐘，好彩我又好快上手。」雖然單車沒為他帶來大富大貴，但單車帶給他豐富的人生歷練，「我家擁有嘅一切都係單車帶畀我嘅，我從來無問為乜踩單車，但我相信付出係有回報，做人最緊要有目標。」間中會想當年嗎？「當然會，家年輕人無咁多磨練，好少可以好似我哋當年咁，咁單純又咁有鬥志。」
李健和：
講波慘過踢波
三屆香港足球先生李健和，由綠茵場踩入公仔箱，今年變身足球評述員。
正式加入有線做足球評述員，和哥笑說講波難過踢波：「以前靠對腳搵食，家靠把口，好有難度，自己講嘢唔係好叻，又唔習慣對鏡頭，外國球員個名六、七個譯音，經常食螺絲。講波好費神，要有記性眼要快，尤其歐聯最難搞，有啲歐洲國家根本唔識，開波之前要做好多資料搜集，一得閒就睇。身體都要適應，以前做運動員生活有規律，早睡早起，家要講外國波，周末多數要捱眼瞓，仲要返東方教波，周日有比賽，星期日會比較忙。」做新丁，和哥記憶起講人生第一場波，講完驚到震，「唔識講，好緊張，當晚好彩拍住德能、堅哥，有佢哋傍住都好啲，但一拍埋去就知自己完全未夠班。」
我頂得住
運動員生涯短暫，不少人鋪定後路，盤算退役後出路。
和哥十八歲開始職業踢波，黃金期是1992至1995年，踢足球從沒想過將來，「我無計劃過自己出路，當時想法好簡單，有心又有態就一路踢落去，差唔多去到三十歲先開始諗以後，就咁考個教練牌打算退役教波。做講波佬都係機緣際遇，有朋友問我有無興趣講波，我就去試試，家當自己係一個學生，由頭學起。」在綠茵場上受盡歡呼聲，但講波就不那麼順利，世界盃時將「科特迪瓦」講成「科迪特瓦」被不少網民訕笑，和哥說從來不上網睇任何評價，「我好少理人哋點講，自己盡咗力就得。以前踢旺角場都有好多球迷鬧，我唔會被佢哋影響，只要求自己做到最好，問心無愧，我知道自己有不足，我會努力，但唔會有任何言論影響到我，我頂得住。」
