特區政府為菲律賓慘劇忙到氣咳，估唔到仲要有人為特區政府添煩添亂。煲呔噚日百忙中抽時間繼續見議員聽取施政報告意見時，唔少議員都同市民一樣極度關注菲律賓慘劇，支持政府追究到底。據聞煲呔提起遭菲律賓冷待時仍然好勞氣。
點知輪到黃宜弘發言時，氣氛急轉直下，事關當大家悲痛心情仲未平復之際，中指黃竟然又提出23條立法問題，認為特區係時候立法，一於同身在北京列席人大會議嘅王敏剛唱雙簧。八方聽聞唔少在席議員包括陳茂波、李鳳英、李國寶同葉劉淑儀等都啞口無言，煲呔就忍住道氣當冇事發生，未獲知音嘅中指黃相當冇癮，頭耷耷離場。