乜嘢係將快樂建築在別人痛苦之上呢？最新樣板係有人喺港人菲律賓被脅持慘劇後，整咗個免費電腦遊戲出嚟，有個警察喺一架康泰旅遊巴上彈出嚟，遊戲玩家用滑鼠「開槍」射擊警察，呢個遊戲甫出街就被網民鬧到飛起，狠批遊戲作者無聊、冷血兼做事唔經大腦。
呢個相信冇乜香港人有興趣玩嘅flashgame叫做BusHostagebyPoliceman，係網民keybol嘅「傑作」，遊戲甫公開就成為網民話題，唔係讚好玩，而係鬧佢好做唔做，網民Adegheiz形容呢個game好可怕，指keybol唔應該將一單血淋淋嘅悲劇變成遊戲，希望keybol盡快刪除。
作者辯稱幫人洩憤
另一網民Webst0r質疑呢個遊戲太冇人性，「死咗咁多無辜嘅人，難以想像死者家人睇到呢個遊戲，有甚麼反應」。
遊戲作者keybol辯稱，呢個game只係想幫大家洩憤，模擬射爆槍手個頭，事關當政府都束手無策嘅時候，惟有自己出手營救人質。咁都講得出，八方覺得真係好離譜。