晚黑7、8點鐘，本應係合家歡睇電視食晚飯時間，星期一晚，香港人睇電視卻目睹喋血街頭恐怖場面，幾個跟團去菲律賓旅行嘅家庭無辜客死異鄉，八方同大家一樣，越睇個心越唔舒服。好多人同八方講，對上一次通宵睇新聞，睇完之後瞓唔着，已經係89年六四嗰次，由於死傷者都係香港人，感受仲震撼過美國911事件。
接待機構安排保鑣跟身
慘劇後港府即時對菲律賓發出黑色旅遊警告，搞到菲律賓好似生人勿近；幾乎隔個月就去一次菲律賓、同當地工會及人權組織開會嘅天主教正義和平委員會幹事孔令瑜，由於經常同當地社運人士接觸，都算係半個菲國國情專家，佢同八方講，其實菲國治安並非想像中差，至少馬尼拉幾太平，係警察差啲。
據講每次孔令瑜到菲律賓，當地接待機構都有安排保鑣跟住佢，孔令瑜話嚴格嚟講唔算係保鑣，「陪住我哋搭車、四圍去啫」。革職警察持槍脅持旅遊巴，好多人覺得匪夷所思，孔令瑜卻話唔意外，「當地警察好大權而且濫權，平時都慣咗打橫行」。佢又話曾在馬尼拉遊行，只有大約300個示威者，卻出動幾千個警員，「當地人權組織同我講，大部份涉及警員嘅案件，甚至命案，都拉唔到人不了了之，有包庇之嫌」。
有菲警反綁架綁匪家人
透過電視直播，好多人質疑菲警罔顧港人安危，孔令瑜亦思疑菲警目的係將槍手置死，事關槍手涉及集體貪污案件，假如俾佢翻案，隨時爆大鑊，警方高層對付佢自然絕不手軟。有報道指警方拘捕槍手弟弟，或因此觸發佢大開殺戒，孔令瑜指出，曾有一啲綁票案，警方會反「綁架」匪徒家人，以交換人質策略同匪徒講數，迫使放人，因此不排除菲警今次都係用呢招，點知「玩大咗」，可憐要多名香港人賠上性命。
香港旅客魂斷菲律賓，家陣好多市民對菲律賓「另眼相看」，孔令瑜希望大家唔好太情緒化，始終呢件都係個別事件，針對菲律賓平民百姓冇意思，菲律賓人面對貪污、濫權嘅警察，受欺壓問題都好嚴重。
mailto:[email protected]