今季有唔少亞洲嘅國腳球員去德國踢波，但喺德甲嘅日本中場香川真司同後衞內田篤人，都出師不利，所屬嘅多蒙特同埋史浩克04都喺首場聯賽輸波。之但係，有「亞洲朗尼」之稱嘅北韓前鋒鄭大世（圖），就威到震，前晚喺德乙處子登場即刻梅開二度，協助波琴主場以3:2擊敗1860慕尼黑。我求大俠喺網上睇番啲精華片段，鄭大世兩球都係頭槌入波，第一球係接應隊友右路底線傳中，前柱楔贏對手飛身插水頂入；第2球就係接應隊友開出嘅角球，禁區內搶點頂入。當然，德乙嘅水準唔可以同德甲相提並論，但鄭大世呢兩個入波，證明佢嘅生理質素絕對唔輸蝕俾啲外國球員。更何況，眾所周知佢係腳勁過頭，所以我求大俠相信佢可兌現承諾，用入波幫波琴重返德甲。