港人喺菲律賓遇害，市民呢幾日心情沉重，匯賢智庫同公民黨噚日不約而同取消一切南區薄扶林補選拉票活動，以示哀悼。噚日亦係匯賢智庫主席葉劉淑儀60歲大壽，匯賢職員原定喺數碼港同佢一邊拉票一邊慶生，點知突逢事變，葉劉決定取消一切慶生活動。
有市民就特別向佢送上涉嫌違例泊車圖片贈興，指葉劉早前為愛將劉應東拉票時，將架名貴波子跑車泊上行人路，俾交通警捉到正。葉劉透過發言人證實，上周日在域多利道準備幫劉應東助選時，確實係遇上交通警，葉劉強調冇被抄牌，交警只係話佢架車泊得唔好，車尾突出路邊，叫佢泊好啲啫。葉劉「相信」嗰度可以泊車，點解？事關佢見過公民黨人拉票時，都係咁就地泊車，言下之意，佢都係有樣學樣，就算犯法，都係人哋衰咗先。