今次香港旅行團喺菲律賓遇上槍手脅持，最終以流血收場，香港人無不感到悲痛，立法會旅遊界議員謝偉俊第一時間飛到當地協助港人，而另一立法會議員、社民連黃毓民睇電視見到當地情況咁惡劣，於是都飛埋過去協助死傷者家屬，仲同家屬一齊跟北京派嚟嘅工作組開會。
黃毓民話會上佢都長話短說，只係講咗幾句，特別係表達家屬最希望快啲處理完遺體善後問題，可以盡快返香港，不過當中有一段小插曲，就係黃毓民向北京代表派卡片，對方收到之後，睇見係嚟自阿爺一直唔妥嘅社民連，但係就竟然冇拒絕，睇一睇就收埋，繼續開會。
今次大家都係為香港人做嘢，政治分歧應該暫時擺埋一邊。