原來，曼城有個型男老闆。蒙蘇（SheikhMansour）個包頭look大家睇得多，原來當佢唔包頭，首次西裝筆挺現身球場睇波，都幾有男人味。型男老闆第一次親臨，球員搏盡，結果主場大炒利物浦3:0。咁好腳頭，唔怪得領隊文仙尼賽後話：「可唔可以個個禮拜都嚟呀，老細。」
以往包住個頭見人
球迷大概同我求大俠一樣，因為蒙蘇收購曼城，至認識呢個阿布扎比億萬富翁，但之前見佢喺公眾場合露面，都係包住個頭，驟眼以為係個阿叔。前日就唔同，就快40歲嘅佢一身老西，容光煥發。再諗到佢同兄弟坐擁7,000億美元（約5.46萬億港元）嘅阿布扎比主權基金，更覺佢貴氣。唔怪得當場波大局已定嗰時，英國攝影師就醒目起勢影住佢。
曼城兵並冇錯過喺有錢老闆面前踢爭氣波，開波13分鐘就先由前阿士東維拉組合建功，占士米拿傳畀巴利先開紀錄。下半場早段泰維斯近門射入連拿個「大細龍門」，然後射入12碼埋齋。缺少停賽兵祖高爾，同埋鬧離隊嘅馬斯真蘭奴，紅軍完全唔掂，除咗謝拉特怒射中柱，其餘時間乏善足陳。炒紅軍3蛋當然唔簡單，曼城喺足智彩嘅奪標賠率轉熱至7倍，直逼第3熱門，6.5倍嘅阿仙奴。
文仙尼：老闆多來捧場
文仙尼賽後意氣風發，除咗叫老闆多啲捧場，又話呢隊曼城係不折不扣嘅「英格蘭製造」：「今晚，我哋有6個英格蘭球員落場。」除咗占士米拿同埋巴利，數今場另一個出色英格蘭兵，一定係左撲右撲嘅門將赫特，佢開季兩場仲未失波。曼城好景，唯一令文仙尼唔開心，肯定係謝路美保定黑上加黑，早前搭飛機時左膝被空姐嘅餐飲車撞中，傷上加傷韌帶撕裂，據講要唞到下月至有望復出。