【本報訊】菲律賓特警隊「童子軍式」土法救人，全球咋舌，有本港前特警狠批當地特警怯懦、無勇無謀，「佢竟然唔敢前進，一個well-trained（訓練有素）嘅特警要諗住完成任務，衝埋去唔可以畏縮，要快過對方，你搞咁耐，裏面個疑犯拎把刀逐個都仲有時間。特種部隊嚟講，真係好低水平」。菲律賓警方則已承認有不足之處。
曾任本港特警的楊佳權指菲警的表現低於正常水平，「香港同其他國家都有特定嘅槍畀狙擊手，但我睇咗咁耐都見唔到一支似樣嘅狙擊手槍，一支好槍準確度好高，500米外一個headshot係完全冇問題，一早開咗槍，歷史就可以改寫」。他又指手槍及M16自動步槍不是「進攻槍」，「太大支，香港特警喺呢種情況下唔會用，會用MP5，方便攜帶，火力亦都夠」。
「冇一個部署係妥當」
他批評整個行動「冇一個部署係妥當」，「國際嘅特種部隊事前都會有預習，好似今次咁，要用同類嘅車嚟試一次，咁樣開門得唔得，正門係向內推，後門向外拉，確保可以做得到先去做，冇理由去到先試。」
進攻手不能單靠「步行」，要同時用吉普車接近旅遊巴，「你行埋去個人都唔夠高，梯又無一條，扑爛個窗都爬唔到入去啦，吉普車一衝埋去就係windowlevel，個窗係不碎玻璃，唔係咁容易打碎，事前要諗係咪用炸藥，用聲波震碎佢，或者直情炸爛個窗」。他指出，開窗很緊要，可造成多個進攻點，並確定犯人位置，「唔係你在光，人哋在暗，咁你點做啫？」
另一方法是用曳光燈，「可以令人10秒鐘之內完全睇唔到嘢，分散槍手嘅注意力，咁你就可以偷時間做到嘢」。他又認同不應讓電視直播，「你點部署都畀個疑犯睇到晒，好不利」。
菲國特警死穴
不足：裝備不足
原因：狙擊手及進攻手所持的槍械不符標準；進攻不應單靠步行，應以吉普車接近旅巴，以便從窗口爬入，至少配備梯子
不足：事前沒有預習
原因：應先找同型號的旅遊巴演習一次，嘗試從正門及後門進入旅巴的方法
不足：多方向進攻
原因：應多方向進攻，令槍手難以應付
不足：確認車內情況
原因：及早爆破車窗、增加照明，確認車內情況，知道槍手位置
不足：不應畏縮
原因：特警受過充足訓練，有方法保護自己，要有決心完成任務
不足：不應讓傳媒直播
原因：令槍手掌握警方部署，非常不智
資料來源：本港前特警楊佳權