【本報訊】「悼念2010-08-23日康泰菲律賓團被殺的香港同胞+抨擊菲律賓警方無能！」隨着電視台全日直播康泰團友被脅持消息，facebook相關群組開完一個又一個，除了大多數表達祝福外，也有人批評馬尼拉警方的行動慢、裝備差，怒火燒遍網絡。
責任全歸咎菲警
名為「菲律賓特別冇種部隊」的facebook群組，開設數小時已有逾2萬人加入。開設群組的網民批評馬尼拉警方：「喺旅遊巴出面搞咗大半個鐘都唔救人，香港警察好佢哋唔知幾多倍，冇人想用十幾條人命，來睇你哋幾咁冇用！」
網民一邊觀看電視直播，一邊評論當地警方的行動。大部份人都認為菲警的行動太緩慢：「殺咗個槍手，啲特種警察先走埋去攞彩，一開頭又唔見咁多人，條友死咗先成班友走埋去，仲要有人喺度笑，過份到咁。」有網民則認為菲警太鹵莽﹕「死蠢到冇人有，有大把裝備都唔用。一時打爛窗一時爆門，究竟佢哋知唔知咁做，好易會激嬲個兇手o架！」
極度憤怒的網友，甚至把團友遇害的責任全盤歸咎警方﹕「本身個槍手都唔想殺人，見佢係咁放人就知啦。之後班打靶警察又唔應承佢，整到佢嬲，咪整到佢咁囉。講到最尾，最衰咪又係菲律賓班警察。」
讀者黃先生不滿菲警配備落後，認為行動時應施放催淚彈，迫使槍手就範；另一讀者李先生則認為，即使到槍手被擊斃後，警方及醫護人員也欠缺適當救援工具，令生還人質遲遲未能離開巴士。香港旅遊業僱員總會副理事長林志挺則譴責槍手利用脅持外國遊客引起當局注意的方式極不恰當，傷害人質更是人神共憤。