葉玉卿之前同老公仔女返香港度假兼探親，幸福滿瀉。相對80年代曾經同卿卿拍過拖嘅張立基，近年幾乎絕迹江湖，好少喺娛樂圈露面。
直至近日，有網民聲稱喺天水圍泳池度偷影咗張立基嘅泳褲相，仲將佢嘅泳褲相放上香港討論區。相中嘅張立基着住條斗零邊泳褲，今年43歲嘅佢，身形都仲keep得唔錯。雖然有部份網民話佢肥，但大部份網民都覺得算可以，話佢咁着仲大膽過上星期六參選嗰班香港先生喎！
自讚Keep得好
不過，噚日馮仁昭打電話畀張立基時，佢話張相其實係佢自己早排放上facebook同微博，唔係俾人偷影，亦唔係喺天水圍泳池度影，相信係網民攞咗自己張相之後扮偷影。問佢覺得自己身形點樣時，張立基話：「幾好吖，keep得幾好，我家仲有做運動。」
講到卿卿早排返過香港，張立基話：「有網民話我知，問我有冇搵佢。呢啲我冇回應、冇嘢講啦，都唔關我事。」張立基話家間唔中都有接吓騷唱歌，好似今個星期五，佢會喺屯門大會堂參與《歌舞昇平》音樂會演出，但因為佢近日整親隻腳，到時只可以齋唱而跳唔到舞。