終審法院首席法官李國能做埋今個月就拜拜，去向備受關注，李官就一早表明無意選特首，咁大律師又冇得做，搞乜好？原來李官晨早決定執教鞭，仲要食齊兩家茶禮，同時擔任港大法律學院名譽教授同中大法律學院榮譽講座教授，9月開始有排忙。
諗過應該冇乜衝突
噚日兩大同日出稿公佈消息，八方心諗係咪大家唔執輸，你出我又出，問番公關先知，兩邊一早有共識，齊齊出稿。聽港大朋友講，李官同港大法律學院關係一向唔錯，成日返去幫手做sharing，啱啱6月先返去大學主持「普通法講座系列」。上年9月佢宣佈退休之後，有次同大學高層傾開，李官就透露自己有意教吓書，法律學院聽到即刻主動出擊，落足嘴頭叫李官留喺港大幫吓手，李官欣然答應。
不過原來同一時間，中大都收到風李官唔do，法律學院亦同時派人聯絡李官，睇吓佢有冇意思去中大教吓書。有中大朋友話，李官堂阿哥兼中大前校長李國章都有出過力，而且李官當年曾經幫手成立中大法律學院，感情分點都有少少，而且佢覺得做晒兩間大學嘅榮譽教授，照計冇乜衝突，結果應承埋中大，幫吓手推廣法律教育。
今次中大出手真係唔低，講嘅唔係人工，而係佢個銜頭，計吓數家仲在生嘅中大榮譽講座教授得10個，除咗李官之外，仲有諾貝爾獎得主高錕、楊振寧等等，所以李官同一班國際級學者睇齊，法律學院仲諗住喺中環美國銀行中心個教育中心整間房畀李官坐。
暫時考慮教普通法
聽講今次李官唔係凈係掛個虛銜，佢喺兩間大學真係會上堂，暫時考慮教普通法。講番兩間龍頭大學嘅法律學院，近年競爭其實好勁，作為老大哥嘅港大，睇住中大法律系04年先成立，四年後已經「升呢」做法律學院，咁快高長大，雖然中大話就話唔會以個別院校做競爭目標，但唔少港大教授就唔係咁自在。八方就覺得，兩間大學今次唔使錢就請到位咁高呢嘅教授，大家都賺咗，唔使爭啦。
mailto:[email protected]